जिल्हाधिकाऱ्यांनी घेतला ग्रामीण भागातील आरोग्याचा आढावा नेत्र, दंत, नाक, कान, घसा तज्ज्ञांसोबत वरिष्ठ अधिकाऱ्यांची बैठक
काळाबाजार करणाऱ्यांवर कडक कारवाई करण्याचे निर्देश
नागपूर: ‘म्युकरमायकोसिस’ अर्थात ‘ब्लँक फंगस’ सोप्या भाषेत काळ्या बुरशीचे ( म्युकरमायकोसिस ) शेकडो रुग्ण जिल्ह्यात आढळून येत आहे. त्यामुळे कोरोना झाल्यानंतर अनेकांना या आजाराने ग्रासले असून शहर व ग्रामीण भागात येत असलेल्या रुग्णांवर योग्य ती उपचार पद्धती निश्चित व्हावी. ग्रामीण भागातील खाजगी व सरकारी दवाखान्यातील सर्व वैद्यकीय कर्मचारी त्यादृष्टीने प्रशिक्षित व्हावे, या आजाराचे जनप्रबोधन व्हावे, यासाठी आज जिल्हाधिकारी कार्यालयात तज्ज्ञ डॉक्टर व वरिष्ठ अधिकाऱ्यांची बैठक झाली.
आजच्या बैठकीमध्ये तज्ज्ञ डॉक्टरांनी म्युकरमायकोसिस संदर्भात जिल्ह्यामध्ये किमान तीनशे ते साडेतीनशे रुग्ण पुढे आल्याचे सांगितले. यामध्ये जिल्ह्यातील नाक, कान, घसा तज्ञ ( इएनटी असोशिएशन ) दंत्त तज्ञ ( डेंटीस्ट ) नेत्र तज्ज्ञ ( आय स्पेशालिस्ट ) डॉक्टर संघटनांचे प्रतिनिधी उपस्थित होते. याशिवाय जिल्हाधिकारी रवींद्र ठाकरे, जिल्हा परिषदेचे मुख्य कार्यकारी अधिकारी योगेश कुंभेजकर, निवासी उपजिल्हाधिकारी अविनाश कातडे, तहसीलदार निलेश काळे व महिला व बालकल्याण विभागातील अधिकारी उपस्थित होते.
आजच्या बैठकीत म्युकरमायकोसिस संदर्भात ग्रामीण भागातील जनतेला सोप्या शब्दांमध्ये समजेल अशी उपचार पद्धत व आजाराबद्दलची माहिती सहज उपलब्ध होईल, असे नियोजन करण्याचे निर्देश त्यांनी दिले. तज्ञ डॉक्टरांनी ग्रामीण भागातील खाजगी डॉक्टरांना तसेच अंगणवाडी सेविका, आशा कार्यकर्त्या व वैद्यकीय अधिकारी कर्मचारी यांना या संदर्भातील मार्गदर्शन करण्याबाबतच्या सूचना केल्या. राज्य सरकार यासाठी आवश्यक असणाऱ्या लसीची खरेदी करणार आहे . त्यामुळे तूर्तास या संदर्भातील उपलब्ध असणाऱ्या काही लसीचा तुटवडा जिल्ह्यात निर्माण झाल्याची माहिती आहे. अन्न व औषधी प्रशासनाच्या अधिकारी तसेच महसूल विभागातील लसीकरणाची जबाबदारी असणाऱ्या अधिकाऱ्यांना अशा पद्धतीचा काळाबाजार कोणी करत असेल तर त्यांच्यावर कारवाई करण्याचे निर्देश देण्यात आले.
ही आहेत लक्षणे
म्युकरमायकोसिस हा काळ्या बुरशीसारखा असतो. हा आजार केवळ डोळ्यांमध्ये नाही तर, मेंदू, हिरड्यांमध्ये तसेच छातीत देखील होऊ शकतो. डोळ्याच्या वरच्या पापणीला सूज येणे, पापणी खाली येणे, डोळा पुढे आल्यासारखा वाटणे, डोळ्यांभोवतीची त्वचा काळसर होणे, डोळ्यांची हालचाल मंदावणे, दोन वस्तू दिसणे, नाकावर सूज येणे , चेहऱ्यावर एका बाजूने सूज, डोळ्यांमध्ये वेदना, चावताना दात दुःखणे, ही या आजाराची लक्षणे आहेत.
या रुग्णांना अधिक धोका रोगप्रतिकारशक्ती कमी असणाऱ्या, मधुमेह असलेल्यांना या नवीन आजाराचा धोका अधिक आहे. कोरोना वाढल्यास अँटिव्हायरल आणि स्टेरॉइड दिले जातात. काही रुग्णांमध्ये नंतर त्याचा प्रतिकूल परिणाम दिसून येतात. त्यामुळे कोरोना काळातील औषधांच्या वापरामुळे रुग्णांना म्युकरमायकोसिसचा धोका संभवतो, अशी माहिती उपस्थित डॉक्टरांनी दिली.
तातडीने ईलाज करा
लक्षणे आढळल्यास त्वरित उपचारांची गरज असते. अन्यथा एक ते दोन आठवड्यांत ही बुरशी डोळे आणि मेंदूपर्यंत पोहोचू शकते. डोळा, जबडा यासंदर्भात गंभीर परिणाम होऊ शकते. त्यामुळे कोविड होऊन गेलेल्या रुग्णांनी त्यांचे तोंड व डोळे यांची तपासणी नियमित करावी. त्यातही ज्यांना मधुमेह असेल त्यांनी तातडीने तपासणी करावी, असे आज बैठकीतील तज्ज्ञांनी स्पष्ट केले.
नागपूर जिल्ह्यातील ग्रामीण भागांमध्ये कोरोना अधिक असणाऱ्या गावांमध्ये तसेच लसीकरणात माघारलेल्या गावांमध्ये अधिकाऱ्यांमार्फत प्रत्यक्ष जाऊन बैठकी घेतल्या जात आहे. म्युकरमायकोसिसवरील प्रबोधन करण्यासाठी या बैठकीतील अनेक डॉक्टर उपस्थित राहणार आहेत.
