नागपूर : कळमना परिसरातील मिनीमाता नगर येथे उघड्या पाण्याच्या टाकीत पडून दोन वर्षांच्या चिमुकल्याचा दुर्दैवी मृत्यू झाल्याची हृदयद्रावक घटना २४ फेब्रुवारी रोजी घडली. या प्रकरणी कळमना पोलिसांनी शेजाऱ्याविरुद्ध निष्काळजीपणाचा गुन्हा दाखल करत अटक केली आहे.
मृत बालकाचे नाव कुश राजेंद्र पटेल (वय २) असे आहे. तो काही वेळ घराजवळ खेळत असताना बेपत्ता झाल्याचे लक्षात येताच कुटुंबीयांनी परिसरात शोधाशोध सुरू केली. दरम्यान, घरासमोरील शेजारी गुड्डू उर्फ इमामुद्दीन मोहम्मद अझरुद्दीन शहा (वय ४२) यांच्या घराबाहेर जिन्याखाली असलेल्या उघड्या पाण्याच्या टाकीत कुश बेशुद्ध अवस्थेत आढळला.
कुटुंबीयांनी तातडीने चिमुकल्याला बाहेर काढून प्रथम पारेख क्लिनिक आणि त्यानंतर वर्धमान नगर येथील डॉ. पुगलिया रुग्णालयात हलवले. मात्र डॉक्टरांनी तपासणीअंती त्याला मृत घोषित केले.
या प्रकरणी जितेंद्र शंकर पटेल (वय ३७) यांनी दिलेल्या तक्रारीवरून पोलिसांनी तपास सुरू केला. प्राथमिक चौकशीत संबंधित शेजाऱ्याने पाण्याची टाकी कोणतेही झाकण किंवा संरक्षक आच्छादन न ठेवता उघडी ठेवली होती, त्यामुळेच चिमुकल्याचा तोल जाऊन तो टाकीत पडल्याचा निष्कर्ष पोलिसांनी काढला आहे.
पोलीस उपनिरीक्षक हनुमंत इंगळे यांनी भारतीय न्याय संहिता कलम १०६(१) अन्वये गुन्हा नोंदवून आरोपीला अटक केली आहे. पुढील तपास सुरू आहे.
या घटनेमुळे परिसरात हळहळ व्यक्त केली जात असून, उघड्या पाण्याच्या टाक्या व धोकादायक रचना सुरक्षित ठेवण्याची गरज पुन्हा अधोरेखित झाली आहे.
