नागपूर – शहरातील रस्त्यांवर भटकणाऱ्या कुत्र्यांचे व्यवस्थापन आणि त्यांच्यासाठी आवश्यक सुविधा पुरवण्यासाठी नागपूर महानगरपालिकेकडून वाठोडा भागात आधुनिक श्वान आश्रय केंद्र उभारण्यात येणार आहे. या केंद्रासाठी ६ कोटी ८९ लाख ६७ हजार २८१ रुपयांचा खर्च मंजूर करण्यात आला आहे.
वाठोडा परिसरात विद्यमान श्वान केंद्राची पायाभूत सुविधा अपुरी असल्यामुळे, नगर आयुक्त आणि प्रशासक डॉ. अभिजीत चौधरी यांच्या निर्देशानुसार नवीन आधुनिक केंद्राची उभारणी करण्याचा निर्णय घेण्यात आला आहे. हे केंद्र सुमारे ३ एकर जागेत उभारण्यात येणार असून, सुमारे २०० कुत्र्यांच्या देखभालीची क्षमता या केंद्रात असेल.
Gold Rate
06 June 2025
या नव्या केंद्रात खालील सुविधा उपलब्ध असणार आहेत:
भटक्या कुत्र्यांसाठी स्वतंत्र आश्रयगृहे
आजारी कुत्र्यांसाठी आइसोलेशन शेड
श्वानांसाठी स्वच्छता सुविधा
आधुनिक पशुवैद्यकीय रुग्णालय
खेळाचे मैदान
रसोईघर, स्टोअर रूम
आणि जनावरांच्या देखभालीसाठी आवश्यक इतर सुविधा
या प्रकल्पाचे आर्किटेक्चरल डिझाईन श्रीपद दुबे यांनी तयार केले असून, एक्सिनो कॅपिटल सर्व्हिसेस आणि श्रीपद दुबे आर्किटेक्ट्स यांना प्रकल्प व्यवस्थापन सल्लागार म्हणून नियुक्त करण्यात आले आहे.
रस्त्यांवरील भटक्या प्राण्यांसाठी चांगले जीवनमान निर्माण करणे आणि जनावरांच्या कल्याणासाठी मूलभूत पायाभूत सुविधा उभारणे, हा या प्रकल्पाचा प्रमुख उद्देश असून, नागपूर मनपाने या उपक्रमाला तांत्रिक मान्यता दिली आहे.
