नागपुर: नागपुरातील हुडकेश्वर पोलीस ठाण्याच्या हद्दीत रविवारी रात्री एक धक्कादायक प्रकार घडला. मद्यधुंद अवस्थेत असलेल्या ट्रकचालकाने भरधाव वेगात वाहन चालवत एकामागोमाग चार कारांना जोरदार धडक दिली. सुदैवाने या घटनेत जीवितहानी टळली असली तरी अनेक वाहनांचे मोठे नुकसान झाले आहे.
ही घटना पिपळा फाटा रोडवर रात्री साडेआठ ते नऊच्या सुमारास घडली. आयशर ट्रक चालवणारा चालक मद्याच्या नशेत होता आणि त्याचे वाहनावर नियंत्रण नव्हते. रॉन्ग साइडने भरधाव वेगात येत त्याने प्रथम एका स्विफ्ट डिजायर कारला धडक दिली. या कारमध्ये एक निवृत्त पोलीस अधिकारी आपल्या कुटुंबासह प्रवास करत होते.
Gold Rate
Apr 272026 - Time 10.30Hrs
पहिल्या धडकेनंतरही चालक थांबला नाही. उलट पळून जाण्याच्या प्रयत्नात त्याने आणखी तीन कारांना धडक दिली. प्रत्यक्षदर्शींच्या मते, ट्रकचा वेग अत्यंत जास्त होता आणि चालक बेफिकीरपणे वाहन चालवत होता.
स्थानिक नागरिकांनी तत्परता दाखवत ट्रकचा पाठलाग केला आणि सुमारे एक किलोमीटर अंतरावर महालगी नगर परिसरात त्याला अडवले. संतप्त नागरिकांनी चालकाला पकडून पोलिसांच्या ताब्यात दिले.
घटनेची माहिती मिळताच पोलीस घटनास्थळी दाखल झाले आणि आरोपीला अटक केली. प्राथमिक तपासात चालक मद्यधुंद असल्याचे स्पष्ट झाले आहे. त्याच्याविरोधात बेदरकार वाहन चालवणे व जनजीवन धोक्यात घालणे यांसह विविध कलमांखाली गुन्हा दाखल करण्यात आला आहे.
या घटनेनंतर परिसरात संतापाचे वातावरण असून, मद्यपान करून वाहन चालवणाऱ्यांवर कठोर कारवाई करण्याची मागणी नागरिकांकडून केली जात आहे. पोलीस सध्या प्रकरणाचा अधिक तपास करत आहेत.
