नागपूर : नागपूर पोलिसांवर टीका करत भ्रष्टाचाराचे आरोप केल्याप्रकरणी एका यूट्यूब पत्रकाराविरुद्ध गुन्हा नोंदवण्यात आला आहे. ही कारवाई जरीपटका पोलिस ठाण्याच्या हद्दीत करण्यात आली.
विजय सीताराम खवसे असे संबंधित यूट्यूब पत्रकाराचे नाव असून जरीपटका पोलिस ठाण्यातील कर्मचारी तरण शर्मा यांनी याबाबत तक्रार दाखल केली आहे. तक्रारीनुसार, ६ फेब्रुवारी रोजी चंचल उर्फ चेतन लक्ष्मेंद्र सहारे याचा एका गुंडाच्या हल्ल्यात मृत्यू झाला होता. त्यानंतर अंत्ययात्रेदरम्यान काही नागरिकांनी मृतदेह जरीपटका पोलिस ठाण्याजवळ आणत निदर्शने केली. परिस्थिती तणावपूर्ण बनल्याने वरिष्ठ अधिकारी आणि पोलिस कर्मचारी घटनास्थळी दाखल झाले. नागरिकांची समजूत काढल्यानंतर मृतदेह नारा घाटाकडे अंत्यसंस्कारासाठी रवाना करण्यात आला.
Gold Rate
Feb 11th, 2026 - Time 11.45Hrs
या संपूर्ण घटनेचे वार्तांकन विजय खवसे यांनी त्यांच्या यूट्यूब चॅनलवर केले. या व्हिडिओमध्ये त्यांनी पोलिस आयुक्त डॉ. रवींद्रकुमार सिंगल यांच्यावर टीका करत पोलिसांवर गंभीर आरोप केल्याचे तक्रारीत नमूद आहे. “पोलिस बिकाऊ आहेत”, “लाच घेऊन आरोपींना सोडले जाते”, तसेच “नागपूरमधील सर्वात भ्रष्ट पोलिस ठाणे जरीपटका आहे” अशा स्वरूपाची विधाने केल्याचा आरोप आहे.
सदर व्हिडिओमुळे समाजात पोलिस दलाविषयी अविश्वास निर्माण होऊन कायदा व सुव्यवस्थेचा प्रश्न निर्माण होऊ शकतो, असे तक्रारीत म्हटले आहे. पोलिसांनी या प्रकरणाचा तपास सुरू केला आहे.
