नागपूर : मंगळवारी सकाळपासून उपराजधानी नागपूरमध्ये जोरदार पावसाने हजेरी लावली आहे. शहराच्या अनेक भागांमध्ये पाणी साचल्याने नागरिकांचे हाल सुरू झाले आहेत. मुसळधार पावसामुळे वाहतूक व्यवस्था कोलमडली असून, जनजीवन विस्कळीत झाले आहे.
सोमवारी दिवसभर हलक्या सरी पडत होत्या, मात्र मंगळवारी पहाटेपासून पावसाने चांगलाच जोर पकडला. पहाटे पाचच्या सुमारास सुरु झालेल्या पावसाची तीव्रता दिवस चढताच वाढत गेली. अनेक रस्त्यांवर पाणी साचल्यामुळे वाहनांची वाहतूक संथगतीने सुरू आहे. काही ठिकाणी वाहनांच्या लांबच लांब रांगा लागल्या असून, वाहतूक कोंडीची स्थिती निर्माण झाली आहे.
Gold Rate
02 Aug 2025
शाळा आणि कार्यालयीन वेळेत अडथळे-
सकाळच्या शाळा आणि कामावर जाण्याच्या वेळेत पावसामुळे नागरिकांना प्रचंड अडचणींना सामोरे जावे लागले. काही भागांमध्ये जलजमाव झाल्यामुळे पादचाऱ्यांचीही गैरसोय झाली आहे.
हवामान विभागाचा इशारा – खबरदारी बाळगा-
हवामान विभागाने नागपूरसाठी पुढील ४८ तासांसाठी ‘येलो अलर्ट’ जारी केला आहे. या कालावधीत शहरात मध्यम ते मुसळधार पावसाची शक्यता वर्तवण्यात आली आहे. पावसाच्या तीव्रतेचा अंदाज घेत नागरिकांनी आवश्यकता नसल्यास घराबाहेर जाणे टाळावे, असा इशारा प्रशासन आणि हवामान विभागाने दिला आहे.
नागरिकांना प्रशासनाचा सल्ला-
“पावसाच्या पार्श्वभूमीवर नागपूरकरांनी सावध राहावे, अनावश्यक प्रवास टाळावा, तसेच शक्य असल्यास घरातच थांबावे,” अशी सूचना आपत्ती व्यवस्थापन विभागाकडून करण्यात आली आहे. अत्यावश्यक सेवा वगळता इतर सर्वांनी खबरदारी घेण्याचे आवाहन करण्यात आले आहे.
