नागपूर : नागपूर जिल्ह्यातील सर्व कृषी केंद्र चालक आणि व्यापाऱ्यांनी विविध मागण्यांसाठी आज संविधान चौकात तीव्र आंदोलन छेडलं. कृषी बियाणे, खते आणि कीटकनाशकांच्या विक्रीतील समस्यांवर सरकारचे लक्ष वेधण्यासाठी हे आंदोलन करण्यात आलं.
आंदोलकांची प्रमुख मागणी होती की, प्रतिबंधित आणि अनधिकृत एचटीबीटी कापसाच्या बियाण्यांची विक्री तातडीने थांबवावी, किंवा त्यास वैधानिक मान्यता देऊन कायदेशीर स्वरूपात विक्रीची परवानगी द्यावी. यासोबतच बिनपरवाना एजंटांकडून शेतकऱ्यांना नकली बियाणे, खते आणि कीटकनाशकं विकण्याच्या घटनांवर तत्काळ कारवाई करण्यात यावी, अशीही त्यांची जोरदार मागणी होती.
Gold Rate
31 dec 2025
प्रदर्शनकर्त्यांनी आणखी एक महत्त्वाचा मुद्दा उपस्थित केला.सरकारी अनुदानित खते कंपन्यांशी जोडण्याऐवजी थेट शेतकऱ्यांपर्यंत पोहोचवावीत, जेणेकरून शेतकऱ्यांना पारदर्शक आणि त्वरित मदत मिळेल.
यासोबतच, ‘साथी’ या ऑनलाइन अॅपलाही विरोध नोंदवण्यात आला. आंदोलकांच्या मते, हे अॅप केवळ डेटाचा वापर करून बीज व्यवसाय काही मोठ्या उद्योगसमूहांच्या हातात सोपवण्याचा प्रयत्न आहे. त्यामुळे या अॅपची तात्काळ रद्दबातल घोषणा करावी, अशी मागणी त्यांनी केली.
सरकारने शेतकरी आणि कृषी केंद्र चालकांच्या या गंभीर मागण्यांकडे गांभीर्याने लक्ष द्यावे, अन्यथा आंदोलन अधिक तीव्र करण्यात येईल, असा इशाराही यावेळी देण्यात आला.
