नागपुर : सिव्हिल लाईन्स येथील उच्च न्यायालयाच्या न्यायाधीशांच्या बंगल्यावर नाईट गार्ड म्हणून तैनात असलेल्या कॉन्स्टेबल अमित झील्पे कोणतीही परवानगी न घेता रात्री उशिरा न्यायाधीशांच्या गाडीतून फिरायला गेले. यादरम्यान रस्त्याच्या कडेला एका खांबाला गाडी धडकल्याने कारचे मोठे नुकसान झाले आहे. त्यानंतर झील्पे यांनी शांततेत कर बंगल्याबाहेर आणून उभी केली. सकाळ झाल्यावर कारची दुरावस्था पाहून हा प्रकार उघडकीस आला. यानंतर परिसरातील फुटेज तपासण्यात आले. अमित झील्पे यांनी हे कृत्य केल्याचे निदर्शनास आले.
हे प्रकरण पोलिस आयुक्तालयापर्यंत पोहोचले. आयुक्त अमितेश कुमार यांनी चौकशीचे आदेश दिले.याप्रकरणी पोलिस आयुक्त अमितेश कुमार यांनी हवालदार अमित झील्पे यांच्यावर गुन्हा दाखल करण्याचे निर्देश दिले आणि त्यांना निलंबितही केले आहे.
Gold Rate
17 June 2025
यापूर्वी कळमना मार्केटमध्ये निवडणुकीनंतर ठेवण्यात आलेल्या ईव्हीएम मशीनच्या स्ट्राँग रूममध्ये गडबड केल्याचा आरोप या हवालदारावर करण्यात आला होता. या प्रकरणाची चर्चा रंगली होती.
पोलीस मुख्यालयात कार्यरत असलेले झील्पे हे सदर भागातील उच्च न्यायालयाच्या न्यायाधीशांच्या शासकीय बंगल्यावर सुरक्षा रक्षक म्हणून कर्तव्य बजावत होते. 5 एप्रिल 2023 रोजी झील्पे यांनी न्यायाधीशांच्या गाडीची चावी चोरली आणि मध्यरात्री कारमधून शहरात फिरत होते. दोन तास कारने प्रवास करून ते बंगल्याकडे परतत असताना वायूसेना नगर येथे भरधाव वेगातील कार अनियंत्रित होऊन रस्त्याच्या कडेला असलेल्या खांबाला धडकली. त्यानंतर अपघातग्रस्त कार घेऊन अमित तत्काळ बंगल्यावर पोहोचले गाडी पार्किंगमध्ये ठेवून निघून गेला. घटनेच्या दुसऱ्या दिवशी न्यायाधीशांचा चालक आल्यावर ही बाब उघडकीस आली.
अमित झील्पे यांच्या पगारातून सुमारे 2 लाख 28 हजार रुपये नुकसानभरपाई म्हणून वसूल केले जाणार आहेत. ही बाब अत्यंत गांभीर्याने घेत पोलीस आयुक्तांनी अशा चुका करणाऱ्यांवर कडक कारवाई करण्याचे आदेश दिले.
