नागपूर : अंबाझरी परिसरातील ४४ एकर जमीन नागपूर महानगरपालिकेकडे (मनपा) परत येणार आहे. महाराष्ट्र पर्यटन विकास महामंडळाला (MTDC) ३० वर्षांच्या लीजवर देण्यात आलेल्या या जमिनीवर थीम पार्क उभारण्याची योजना होती. मात्र, प्रकल्पाला अपेक्षित वेग न मिळाल्याने आणि दीर्घकाळ विकास थांबून राहिल्याने मनपाने ही जमीन परत घेण्याचा निर्णय घेतला आहे.
२०१९ साली एमटीडीसीने अंबाझरी परिसरात थीम पार्क, मनोरंजन उद्यान, ॲडव्हेंचर स्पोर्ट्स, मल्टिप्लेक्स आणि अन्य पर्यटन सुविधा उभारण्याची घोषणा केली होती. परंतु गेल्या काही वर्षांत या प्रकल्पात कोणतीही लक्षणीय प्रगती झाली नाही. त्यामुळे मनपाने पुनरावलोकन करून जमीन आपल्या ताब्यात घेण्याचा प्रस्ताव मंजूर केला आहे.
Gold Rate
Sept 12,2026 - Time 10.30Hrs
मनपाच्या अधिकाऱ्यांनी बजेट, अधिकारक्षेत्र आणि जमीन व्यवस्थापनाचा सविस्तर आढावा घेतल्यानंतर हा निर्णय घेतल्याची माहिती मिळाली आहे. अंबाझरी परिसरातील ही जमीन आता पुन्हा मनपाच्या नियंत्रणाखाली येणार असून, ती नव्या विकास आराखड्यासाठी वापरली जाण्याची शक्यता आहे.
थीम पार्क योजनेच्या अपयशामागे आर्थिक अडचणी, प्रकल्प व्यवस्थापनातील त्रुटी आणि वेळेवर काम पूर्ण न होणे ही प्रमुख कारणे असल्याचे सांगितले जात आहे. मनपाच्या या निर्णयामुळे शहरातील विकास प्रकल्पांना नवसंजीवनी मिळेल, तसेच नागरिकांना अधिक नियोजित आणि सुसज्ज सुविधा उपलब्ध होण्याची अपेक्षा व्यक्त केली जात आहे.
