नागपूर : शहरातील काही भागांमध्ये ३६ तास पाणीपुरवठा बंद ठेवण्याच्या निर्णयामुळे नागपूरच्या प्रमुख शासकीय रुग्णालयांपुढे मोठे आव्हान उभे ठाकले आहे. ऑरेंज सिटी वॉटर प्रायव्हेट लिमिटेडकडून मंगळवार सकाळी १० वाजल्यापासून बुधवारी रात्री १० वाजेपर्यंत पाणीपुरवठा खंडित राहणार असल्याचे जाहीर करण्यात आले आहे.
या पार्श्वभूमीवर मेयो रुग्णालय (IGGMCH) आणि शासकीय वैद्यकीय महाविद्यालय व रुग्णालय (GMCH) येथे उपचारासाठी दाखल असलेले रुग्ण, त्यांचे नातेवाईक, तसेच निवासी डॉक्टर आणि विद्यार्थी यांना मोठ्या गैरसोयींचा सामना करावा लागू शकतो. विदर्भासह इतर राज्यांतून मोठ्या संख्येने येणाऱ्या रुग्णांमुळे या रुग्णालयांवर ताण वाढण्याची शक्यता आहे.
Gold Rate
Apr 06,2026 - Time 10.30Hrs
मेयोचे अधीक्षक डॉ. नितीन शेंडे यांनी सांगितले की, पाण्याची कमतरता भासू नये म्हणून २५ टँकरची मागणी करण्यात आली असून गरजेनुसार आणखी टँकर उपलब्ध करून घेतले जातील. तर GMCH चे अधीक्षक डॉ. अविनाश गवांदे यांनी वारंवार होणाऱ्या अशा समस्यांवर तोडगा काढण्यासाठी स्वतंत्र पाणीपुरवठा लाईन देण्याची मागणी केली आहे.
तप्त उन्हाळ्यात अचानक झालेल्या या बंदीमुळे रुग्णसेवा, स्वच्छता आणि रुग्णालयातील नियमित कामकाज विस्कळीत होण्याची भीती व्यक्त केली जात आहे. तात्पुरत्या उपाययोजना केल्या जात असल्या तरी पुढील काही तास रुग्णालयांसाठी कठीण ठरण्याची शक्यता नाकारता येत नाही.
