Published On : Wed, Jul 31st, 2019

राष्ट्रवादी युवक काँग्रेसची मंत्रालयावर धडक

– जोरदार घोषणाबाजी करत मंत्रालय परिसर दणाणून सोडला,बेरोजगारी विरोधात राष्ट्रवादी युवक आक्रमक

मुंबई : बेरोजगारीच्या विरोधात आक्रमक झालेल्या राष्ट्रवादी युवक काँग्रेसने आज मंत्रालयावर अचानक धडक देत सरकारविरोधात जोरदार घोषणाबाजी केली.

राष्ट्रवादी युवकने अचानक केलेल्या आंदोलनामुळे पोलिसांची चांगलीच तारांबळ उडाल्याचे पहायला मिळाले.

सरकारने दरवर्षी २ कोटी रोजगारनिर्मिती करण्याचे दिलेले आश्वासन हवेतच विरले आहे. या फसव्या आश्वासनांचा निषेध करत राष्ट्रवादी युवक काँग्रेसचे प्रदेशाध्यक्ष मेहबुब शेख यांच्या नेतृत्वाखाली हे आंदोलन करण्यात आले.

राज्यातील तरुण वर्ग हवालदिल झाला असताना मुख्यमंत्री निवडणुक प्रचाराच्या यात्रा काढण्यात व्यस्त आहेत म्हणून सरकार विरोधात जोरदार घोषणाबाजी करुन राष्ट्रवादी युवक काँग्रेसच्या पदाधिकाऱ्यांनी आणि कार्यकर्त्यांनी सरकारच्या नाकर्तेपणाचा निषेध करत थेट मंत्रालयात धडक दिली आणि सरकारविरोधात जोरदार घोषणाबाजी केली.

यावेळी राष्ट्रवादी युवक काँग्रेसचे कार्याध्यक्ष रविकांत वर्पे, कार्याध्यक्ष सुरज चव्हाण आणि युवकचे इतर प्रमुख पदाधिकारी उपस्थित होते.