नागपूर : देशातील अत्याधुनिक आणि सुरक्षित मानल्या जाणाऱ्या वंदे भारत एक्सप्रेसमध्ये तब्बल 20 लाख रुपयांहून अधिक किमतीच्या ऐवजाची चोरी झाल्याची धक्कादायक घटना समोर आली आहे. अजनी रेल्वे स्थानकावरून पुण्याकडे प्रवास करणाऱ्या एका महिला प्रवाशाचे पर्स अज्ञात चोरट्याने लंपास केल्याने रेल्वे सुरक्षा व्यवस्थेवर प्रश्नचिन्ह निर्माण झाले आहे.
मिळालेल्या माहितीनुसार, पुणे येथील अंजली अजय मुधाळकर (वय 67) या 10 जून रोजी वंदे भारत एक्सप्रेस (क्रमांक 26102) च्या सी-4 डब्यातील सीट क्रमांक 29 वरून प्रवास करत होत्या. त्या अजनी रेल्वे स्थानकावरून पुण्यासाठी गाडीत चढल्या होत्या. प्रवासादरम्यान त्यांच्या बॅगेत ठेवलेले पर्स अज्ञात चोरट्याने चोरून नेले.
या पर्समध्ये 8 हजार रुपये रोख रक्कम, ओळखपत्रे, सोन्याचे टॉप्स, नेकलेस, सोन्याची चेन, डायमंड पेंडंट, सोन्याचे मंगळसूत्र तसेच इतर मौल्यवान दागिने होते. चोरी गेलेल्या ऐवजाची एकूण किंमत सुमारे 20 लाख 75 हजार 500 रुपये असल्याचे सांगितले जात आहे.
पर्स चोरीला गेल्याचे लक्षात येताच महिलेने तत्काळ रेल्वे अधिकाऱ्यांना माहिती दिली. वंदे भारतसारख्या हाय-प्रोफाईल रेल्वेगाडीत लाखो रुपयांच्या चोरीची घटना समोर आल्यानंतर रेल्वे सुरक्षा बल (RPF) आणि शासकीय रेल्वे पोलीस (GRP) यंत्रणा सतर्क झाली.
गाडी वर्धा स्थानकावर पोहोचल्यानंतर आरपीएफच्या जवानांनी महिलेची चौकशी करून घटनेची प्राथमिक माहिती घेतली. त्यानंतर जीआरपीकडे तक्रार दाखल करण्यात आली असून अज्ञात आरोपीविरुद्ध चोरीचा गुन्हा नोंदवून तपास सुरू करण्यात आला आहे.
दरम्यान, आरोपीचा शोध घेण्यासाठी रेल्वे स्थानके आणि गाडीतील सीसीटीव्ही फुटेज तपासले जात आहेत. या घटनेमुळे रेल्वे प्रवाशांच्या सुरक्षेबाबत पुन्हा एकदा चिंता व्यक्त केली जात असून, आरोपीला लवकरात लवकर अटक करण्यासाठी सर्व बाजूंनी तपास सुरू असल्याची माहिती जीआरपीकडून देण्यात आली आहे.
प्रवाशांना पोलिसांचे आवाहन –
रेल्वे पोलिसांनी प्रवाशांना प्रवासादरम्यान आपले मौल्यवान सामान, दागिने आणि बॅग यांची विशेष काळजी घेण्याचे आवाहन केले आहे. कोणतीही संशयास्पद हालचाल आढळल्यास तात्काळ आरपीएफ किंवा जीआरपीशी संपर्क साधण्याचेही आवाहन करण्यात आले आहे.
