नागपूर: शहरातील कळमना हद्दीत सुरू असलेल्या अवैध शस्त्र विक्रीच्या रॅकेटवर गुन्हे शाखेने मोठा प्रहार केला आहे. घरफोडी पथकाने कारवाई करत चार तरुणांना अटक केली असून त्यांच्या ताब्यातून दोन देशी बनावटीची पिस्तुले, ३४ जिवंत काडतुसे, चार मॅगझिन आणि चार मोबाईल फोन जप्त करण्यात आले आहेत. जप्त साहित्याची किंमत सुमारे १.७६ लाख रुपये असल्याचे पोलिसांनी सांगितले.
पहाटेची सापळा कारवाई-
१९ फेब्रुवारी २०२६ रोजी पहाटे मिळालेल्या गुप्त माहितीनंतर गुन्हे शाखेने भारतवाडा येथील शिवशंभू नगर भागात सापळा रचला. सराईत गुन्हेगाराकडे शस्त्रसाठा असल्याची खात्रीशीर माहिती मिळाल्यानंतर पोलिसांनी तात्काळ छापा टाकला.
Gold Rate
Feb 19th, 2026 - Time 11.45Hrs
या कारवाईत शुभम बलराम जांगेळ (२४) याला अटक करण्यात आली. चौकशीत त्याने सागर चौधरी याच्याकडून विक्रीसाठी पिस्तुल घेतल्याची कबुली दिली. त्याच्या घरातून दोन काडतुसे आणि मोबाईल जप्त करण्यात आला.
साखळी उलगडत चौघांपर्यंत पोहोच-
तपासाचा धागा पकडत पोलिसांनी सागर रमेश चौधरी (२७) याला ताब्यात घेतले. त्याने शस्त्र श्रेयस अमरदीप यादव (२३) याच्याकडून मिळाल्याचे सांगितले. त्यानंतर यादवला जाम नगर परिसरातून अटक करण्यात आली.
यादवने शस्त्रे पर्डी येथील नवीन नगरमध्ये राहणाऱ्या वंश संतोष सिन्हा (१९) याच्याकडे ठेवली असल्याचे उघड केले. पोलिसांनी सिन्हाकडून एक पिशवी जप्त केली. त्यात दोन पिस्तुले, चार मॅगझिन आणि ३२ जिवंत काडतुसे सापडली.
उत्तर प्रदेशातून खरेदीचा खुलासा-
चौकशीत श्रेयस यादवने ही पिस्तुले उत्तर प्रदेशातील ओळखीच्या व्यक्तीकडून प्रत्येकी ३५ हजार रुपयांना खरेदी केल्याचे सांगितले. ती अधिक दराने विक्री करून आर्थिक फायदा मिळवण्याचा त्यांचा डाव होता, असे पोलिसांनी नमूद केले.
गुन्हा दाखल, तपास सुरू-
या प्रकरणी कळमना पोलीस ठाण्यात शस्त्र कायद्याच्या विविध कलमांखाली तसेच महाराष्ट्र पोलीस कायद्यान्वये गुन्हा नोंदवण्यात आला आहे. आरोपींना अटक करून पुढील तपास सुरू असून या प्रकरणामागील संभाव्य आंतरराज्यीय साखळीचा शोध घेतला जात आहे. जप्त मोबाईलमधील डिजिटल माहितीचीही तपासणी सुरू आहे.
ही कारवाई वरिष्ठ अधिकाऱ्यांच्या मार्गदर्शनाखाली गुन्हे शाखेच्या पथकाने यशस्वीरीत्या पार पाडली.
