नागपूर : महाराष्ट्र काँग्रेसचे प्रदेशाध्यक्ष हर्षवर्धन सपकाल यांनी टीपू सुलतान आणि छत्रपती शिवाजी महाराज यांची तुलना केल्याच्या वक्तव्यावरून राज्यातील राजकारणात तीव्र प्रतिक्रिया उमटत आहेत. या वक्तव्याच्या निषेधार्थ रविवारी नागपुरात भाजप युवा मोर्चाच्या कार्यकर्त्यांनी आक्रमक आंदोलन छेडले.
महल परिसरातील गांधी गेट येथे, जिथे छत्रपती शिवाजी महाराजांची भव्य प्रतिमा आहे, त्या ठिकाणी भाजप कार्यकर्ते मोठ्या संख्येने जमले. त्यांनी हर्षवर्धन सपकाल यांच्या विरोधात जोरदार घोषणाबाजी केली. निषेध व्यक्त करताना कार्यकर्त्यांनी सपकाल यांच्या छायाचित्रांवर चप्पल फेकून संताप व्यक्त केला.
Gold Rate
Feb 16th, 2026 - Time 11.45Hrs
भाजप पदाधिकारी व कार्यकर्त्यांचा आरोप आहे की, अशा प्रकारची तुलना करून इतिहासाचे विकृतीकरण करण्यात आले असून शिवभक्तांच्या भावना दुखावल्या गेल्या आहेत. या प्रकरणी सपकाल यांनी संपूर्ण महाराष्ट्राची जाहीर माफी मागावी, अशी मागणी आंदोलनकर्त्यांनी केली.
दरम्यान, जोपर्यंत सपकाल माफी मागत नाहीत, तोपर्यंत त्यांना नागपूर शहरात प्रवेश करू देणार नाही, असा इशाराही काही भाजप नेत्यांनी दिला आहे. या घटनेमुळे नागपुरातील राजकीय वातावरण अधिकच तापले आहे.
